ಮೈಸೂರು ರಸ್ತೆ ಸಾರಿಗೆ ಸಂಸ್ಥೆಯಲ್ಲಿ ಕಂಡಕ್ಟರ್ ಆಗಿ ಕೆಲಸಕ್ಕೆ ಸೇರಿ ನಂತರ ಸಂಜೆ ಕಾಲೇಜಿನಿಂದ ಬಿ.ಎ. ಪದವಿ ಹಾಗೂ ಕನ್ನಡದಲ್ಲಿ ಎಂ.ಎ. ಪದವಿ ಪಡೆದರು. ಸಕ್ಕರೆ ಕಾರ್ಖಾನೆಯಲ್ಲಿ ವೇಳಾಧಿಕಾರಿಯಾಗಿ ಕೆಲಸ ಮಾಡುತ್ತಿದ್ದ ಎಂ. ಅಂಕೇಗೌಡ ತಮಗೆ ಬರುತ್ತಿದ್ದ ಅಲ್ಪ ಸಂಬಳದ ಬಹು ಪಾಲನ್ನು ಪುಸ್ತಕಗಳಿಗಾಗಿ ಮೀಸಲಿಡುತ್ತಿದ್ದರು.
ಸಣ್ಣ ಸಣ್ಣ ಪುಸ್ತಕ ಖರೀದಿಯಿಂದ ಆರಂಭಗೊಂಡ ಇವರ ಸಂಗ್ರಹಣೆ ಕೊನೆಗೆ ಮನೆಯಲ್ಲಿ ಜಾಗವಿಲ್ಲದಷ್ಟು ಪುಸ್ತಕಗಳು ಬಂದು ಸೇರಿದವು. ಇದನ್ನು ಮನಗಂಡ ಉದ್ಯಮಿ ಒಬ್ಬರು ದೊಡ್ಡ ಕಟ್ಟಡವನ್ನು ನಿರ್ಮಿಸಿಕೊಟ್ಟರು. ಅಂಕೇಗೌಡ ಜ್ಞಾನ ಪ್ರತಿಷ್ಠಾನದ ಅಡಿಯಲ್ಲಿ ಈ ಗ್ರಂಥಾಲಯಕ್ಕೆ ‘ಪುಸ್ತಕದ ಮನೆ’ ಎಂದು ಹೆಸರಿಡಲಾಯಿತು. ಈ ಕಾರ್ಯದಲ್ಲಿ ಅವರ ಪತ್ನಿ ವಿಜಯಲಕ್ಷ್ಮಿ ಸಂಪೂರ್ಣ ಸಹಕಾರವಿದೆ.

ಇಂದು ಗ್ರಾಮೀಣ ಪ್ರದೇಶದಲ್ಲಿ ಶುಲ್ಕವಿಲ್ಲದೆ ಜ್ಞಾನವನ್ನು ಹಂಚುವ ಪುಸ್ತಕಗೆ ದೇಶ – ವಿದೇಶಗಳಿಂದ ಸಂಶೋಧಕರು, ಸಾಹಿತಿಗಳು, ವಿದ್ಯಾರ್ಥಿಗಳು ಹಾಗೂ ಪುಸ್ತಕ ಪ್ರೇಮಿಗಳು ಭೇಟಿ ನೀಡಿ ಅಂಕೇಗೌಡರ ಸಂಗ್ರಹಣೆ ಕಂಡು ಬೆರಗಾಗುತ್ತಿದ್ದಾರೆ. ಸಂಶೋಧಕರಿಗೆ ಅಂಕೇಗೌಡರ ಈ ಪುಸ್ತಕ ಸಂಗ್ರಹ ಅತ್ಯುತ್ತಮ ಸಂಪನ್ಮೂಲವಾಗಿದೆ.

2016ರಲ್ಲಿ ಲಿಮ್ಕಾ ಬುಕ್ ಆಫ್ ರೆಕಾರ್ಡ್ಸ್ ವತಿಯಿಂದ ‘ವೈಯಕ್ತಿಕವಾಗಿ ಅತಿ ಹೆಚ್ಚು ಪುಸ್ತಕಗಳನ್ನು ಸಂಗ್ರಹಿಸಿದ ವ್ಯಕ್ತಿ” (Largest Personal Book Collection) ಎಂದು ಗುರುತಿಸಿ ಗೌರವಿಸಲಾಗಿತ್ತು ಹಾಗೆ 2014 ರಲ್ಲಿ ರಾಜ್ಯೋತ್ಸವ ಪ್ರಶಸ್ತಿಗೆ ಭಾಜನರಾಗಿದ್ದರು.

ಇದೀಗ 2026 ನೇ ಸಾಲಿನ ಪದ್ಮಶ್ರೀ ಪ್ರಶಸ್ತಿಗೆ ಎಂ. ಅಂಕೇಗೌಡ ಆಯ್ಕೆ ಆಗಿರುವುದು ಹೆಮ್ಮೆಯ ಸಂಗತಿ. ಮೊಬೈಲ್ ಸ್ಕ್ರೀನ್ ನಲ್ಲಿ ಮುಳುಗಿ ಪುಸ್ತಕಗಳನ್ನು ಮರೆತು ಹೋಗಿರುವ ಇಂದಿನ ಯುವ ಜನತೆಗೆ ಅಂಕೇಗೌಡರ ಪುಸ್ತಕ ಪ್ರೇಮ ನಿಜಕ್ಕೂ ಪ್ರೇರಣಾದಾಯಕವಾಗಿದೆ.